तोही हरवला
अशी सारखी सारखी कुठे हरवतेस
त्यानं विचारलं
नितळ आकाशातील चांदण्यांचे ठिपके करून
रांगोळी रेखण्यात मग्न असलेल्या
तिच्यापर्यंत त्याचा प्रश्‍न पोहोचलाच नाही
चांदण्यांची उठाठेव करणाऱ्या तिच्या
भावविभोर स्वप्नाळू डोळ्यात पाहताना
त्यालाही त्याच्या प्रश्‍नाची निरर्थकता उमगली
आणि दुधेरी चांदण प्रकाशात एक आकाशातला
आणि दुसरा भुईवरचा चंद्र न्याहाळण्यात
मग तोही हरवला
****************************************
शिशिर
सुकलेले बुंधे
गोठलेला शिशिर
उजाड घरटे
उदास सांज
बोचरा वारा
सुरांवर झुलणारा
जीवघेणा मारवा
सावळे आभाळ
सावळी भुई
जीवनावर रुसलेली
निष्पर्ण राई
व्याकुळ डोळे
कोंदलेलं अंबर
परतीच्या वाटेवर
भुकेला हंबर
दूरदेशी घरधनी
थरथरली वात
आसवांचा महापूर
पापण्यांच्या आत
****************************************
जागवण्याचा खूप अट्टाहास केला
तरी कूस बदलून ते परत स्वप्नात दंग होतात
माझ्या मनात मात्र भावनांचा कल्लोळ
शब्दांशिवाय मी अस्वस्थ...
****************************************
सर्वस्व व्यापून दशांगूळे उरलेली
युगाच्या सीमेवर उभी ती, अस्वस्थ
तांबड फुटण्याची वाट पाहात...
****************************************